Hobby Horse, jóga og ratleikur í Fjölskyldu- og húsdýragarðinum #BeActive
Reykjavík Park and Zoo, Múlavegur 2, 104 Reykjavík Directions
Sun Sep 27 2026 12:00
Í tilefni af Íþróttaviku Evrópu verður fjölbreytt dagskrá í Fjölskyldu- og húsdýragarðinum sunnudaginn 27. september.
Kl. 12 til 16. Boðið verður upp á Prikhestabraut (e. hobby horse track) þar sem gestum gefst kostur á að prófa þessa skemmtilegu íþrótt. Rætur Prikhesta má rekja aftur til Englands á 14. öld en snemma á þessari öld náði hún vinsældum á ný í Finnlandi og síðar víða um heim. Komdu með þinn eigin prikhest eða fáðu lánaðan hest í garðinum.
Kl. 13 Fjölskyldujóga. Notaleg og skemmtileg jógastund fyrir alla fjölskylduna. Mikilvægt að mæta tímanlega.
Kl. 14 til 16 Acro jóga smiðja. Prófaðu eitthvað nýtt! Leikur, jafnvægi, samvinna og hreyfing fyrir alla fjölskylduna.
Kl. 10 til 17 Ratleikur. Hvernig hreyfa dýrin sig – og af hverju? Dýr hreyfa sig á ótrúlega fjölbreyttan hátt. Sum hlaupa, önnur hoppa, skríða, synda eða fljúga. Hreyfingin getur hjálpað þeim að finna fæðu, forðast hættur, verja svæði, finna maka eða einfaldlega komast á milli staða. Í þessum ratleik kynnumst við hreyfingum dýranna á skemmtilegan og fræðandi hátt. Fylgdu vísbendingunum um garðinn, skoðaðu dýrin og veltu fyrir þér hvernig líkami þeirra og hreyfingar hafa aðlagast ólíkum aðstæðum. Hreyfum okkur og uppgötvum hvernig dýrin hreyfa sig!
Íþrótta- og Ólympíusamband Íslands (ÍSÍ) hefur undanfarin ár hlotið styrk í gegnum Erasmus+ styrkjakerfi Evrópusambandsins (European Commission) vegna Íþróttaviku Evrópu.
Íþróttavika Evrópu (European Week of Sport) er haldin ár hvert dagana 23. – 30. september í yfir 40 Evrópulöndum. Markmið verkefnisins er að kynna íþróttir og almenna hreyfingu og sporna gegn auknu hreyfingarleysi meðal almennings. Íþróttavikan er ætluð öllum, óháð aldri, bakgrunni eða líkamlegu ástandi. Lögð er sérstök áhersla á að virkja grasrótina og hvetja fólk til að hreyfa sig meira í daglegu lífi. Evrópubúar sameinast undir slagorðinu #BEACTIVE
